Fjernar badebrygga i Mobergsvikjo

Bergen og omland friluftsråd (BOF) fjernar tre badebrygger i bergensområdet.

Årsaka er frykt for badeulykker etter at fleire badeflåtar andre stadar i landet har blitt velta.

– Frykta vår er at nokon skal skada seg alvorleg, seier administrativ leiar i BOF, Dag Setre, til NRK Vestland.

Dei fjernar no badebryggene i Tennebekkstjernet, på Krohnegården badeplass og i Mobergsvikjo. Andre skal bli overvaka.

Blei velta for to år sidan

Midtsiden kjenner ikkje til at brygga i Vikjo har vore velta eller herja med i årets sesong, men det er ikkje lenge sidan sist.

Badebrygga blei velta med vilje av ungdomar i 18-20-årsalderen sommaren 2018. Ein ung gut blei lettare skadd.

I forkant skal dei har svart med ein frekk tone då vaksne ba dei gi seg med å vugga brygga fram og tilbake.

I 2016 blei stupebrettet knekt.

– Det er berre i Os dette skjer, sa BOF for fire år sidan.

Tryggare alternativ

Ei løysing for Os, og andre stadar, kan vera ei senterfesta badebrygge.

Wee Marine lanserte den vesle badebrygga «Bahamas» i mai i år. Den er konstruert i betong med innstøypte flyteelement, og med senterplassert og beskytta kjettingfeste.

Flytebrygga er utvikla og produsert i samarbeid med Etnebrygga, og kjem i tre ulike storleikar.

Prisen er frå 32.000 kroner.