Reparerer Baronsbrua

Brua frå Baronsplassen ved torget, over mot Kyrkjeflaten, skal få nytt dekke.

– Det var nokre skadde fliser og ein viss snublefare på brua. Vi ønskte å reparera dette snarast, og før det blir kaldare og fare for glatte fortau, seier Kjeti Bjørgo Helgesen, vaktmeister i Bjørnafjorden kommune.

– Heldigvis kunne murmeister Kjell Røttingen snu seg raskt rundt når det no blei fint vêr.

Den idylliske plassen med elv, trapp og hoppesteinar, blei opparbeidd og opna sommaren 2009.

Arbeidet med å få opp dei gamle flisene starta i dag. Gangbrua er stengt utover dagen.

– Vi skal skrapa og spyla reint før den opnar. Gangbrua blir stengt igjen når vi skal legga nye fliser, men det er ikkje bestemt kva dag det blir, seier Steffen frå Kjell Røttingen AS.