Fekk 6 påmeldte på 1 time

Bildeserie:

1 av 4

Formiddag, ettermiddag og kveld - då Dragebåtfestivalen i fjor kom til Os blei det ein samanhengande fest frå prosesjonen frå grusbanen gjennom sentrum til partytelt og start i Hamnevegen.

Sjå video og stor bildeserie frå Dragebåtfestivalen 2015.

– Sjølv om forholda blei omtrent så vanskelege som dei kunne bli, så fekk vi med redusert mannskap om bord og ei lita omlegging av ruta, gjennomført og kåra vinnarar i fire ulike heat, seier David Genius frå SES-gruppen.

I samarbeid med Solsiden lagde dei fest både før, under og etter padlinga, også konserten med Bjørn Jensen og Svein Tore «Klabbetrynet» Hindenes blei utfordrande grunna lyn, torden og tungt regn rundt teltet. Men det øydela ikkje stemninga.

– Det som imponerte med mest var at det var så stor oppslutnad om å gå i prosesjon og å kle seg ut. Alle var med på leiken og dette skapte ein fin ramme på heile dagen, synest Solsiden-sjef Tore André Sagstad.

Fekk god hjelp

Han er takksam for at Os brannvesen stilte med bil i front av toget og med pumper då drakebåtane gjekk ned. Også Os Dykkerklubb stilte for å hjelpa.

– Tryggleiken kjem først. Vi var førebudde på at det kunne ligga 36 i sjøen samtidig, og sånn blei det jo i enkelte heat òg, seier Genius.

Frå 12 til 30 deltakarar

12 lag stilte til start i fjor. Energi Treningssenter vann finalen framfor Vestmekaniske og Skaathun Bilverksted.

– Då vi tok ein ringerunde før helga fekk vi allereie booka inn seks lag til årets festival. Tittelforsvararane er blant dei seks, fortel David.

Det er plass til 30 lag og arrangørane trur det kan bli både fullt og ventelister før start laurdag 27. august i år.

– Dette er ein fin kickstart på hausten, som lagbygging med firma, kanskje i staden for blåtur. No har folk sett kva dette er, og at vi klarer å få det kjekt sjølv om vêret er ruskete.

I fjor køyrde Underholdning Vest to Dragebåtfestivalar, den eine i Os, den andre i Lindås. I år skal dei nye drakebåtane rundt på festival fleire stadar, i tillegg til Os og Lindås blir det padling på Voss, i Eidfjord og i Florø.