Nyopning i Hamnevegen

Bildeserie:

1 av 4

Dei klarte datoen, torsdag 4. desember, Vitusapotek som i juni fortalte at dei ville etablera seg i Irisgården i Os sentrum. Irisgården har frå før både legar, tannlegar, kiropraktor og fysioterapeut blant leigetakarane, og fekk i haust Energi Trenig på gateplan. Vitusapotek ligg mellom treningssenteret og Vinmonopolet, der det før var videoutleige og resepsjon for bowlingen.

I god «Liv på Øyro»-ånd var ordførar Terje Søviknes på plass for å klippa snor, ønskja velkomen og dela ut Os inspirerer-plakett.

– Dette er eit av våre større apotek, her er det lagt til rette for ganske stor omsetnad, sa prosjektleiar med ansvar for nyetableringar, Jan Arne Frogner frå kjedeadministrasjonen.

Ei kjede i utviding

Apoteket i Irisgården er på rett over 240 kvadratmeter. Vitusapotek er eigd av Norsk Medisinaldepot AS (NMD) og alle dei til no 208 apoteka er eigd av kjeden. I tillegg er dei grossist for rundt 70 ulike Ditt Apotek.

– Vi har opna 7-8 Vitusapotek i år, inkludert eit vi kjøpte i Fusa i september, og opnar endå fleire neste år.

Apoteket i Fusa og leigekontrakten i Irisgården blei kjøpta av Linda H. Frøynes og mannen, som tidlegare selte apoteket til AMFI Os. Linda var på opningsdagen og delte ut gåve til sine nye kjede-venninner.

– Heldig med søkjarmassen

Håvard Loftheim er frå Askvoll og jobba på Vitusapotek Frekhaug før han i dag blei apotekar på Os.

Med seg i arbeidsstyrken har han fire tilsette i full stilling, to farmasøytar og to teknikarar.

– Normalt er det vanskeleg å få tak i farmasøytar, men vi har vore heldige med søkjarmassen og fått med nokre erfarne damer.

– Eg er einaste mann i staben, og yngst, fortel Loftheim, som likevel ikkje trur det skal bli vanskeleg å vera leiar i det nye apoteket.

Åleine om enkelte varer

I tillegg til å vera stort og moderne innreia, blant anna med heve- og senkedisk i alle kassane og elektronisk motor på dei store lagerhyllene, er Vitusapotek Os åleine om enkelte varer.

– Vi er einaste apotek i Os som har kontaktlinser og lesebriller. I tillegg har vi solbriller, fortel Marianne Tysse Sperrevik.

Marianne, som har jobba i til saman 12 år på dei to andre apoteka i Os, fortel også om nokre spesielle og populære hudpleieprodukt.

– Dermalogica og L’Occitane er merker som Vitus er åleine om, og som berre utvalte Vitusapotek har. Vi har vore heldige og fått dei her på Os.

Vitusapotek på Bystasjonen har eigen hudpleieavdeling, og apotekteknikar og hudpleiar Stine Byrkjeland er i dag på Os for å analysera huden til kundane som kjem på opningsdagen.

– Kva med dei som handlar på resept, må dei vera spesifikk med legen no når det er to ulike kjedar i Os?

– Nei. Det blei slutt på dette då e-resepten kom. Resepten blei lasta opp til ein base som alle apotek i heile Noreg har tilgang til. Uansett kjede og by du er i kan du handla det du har resept på, fortel Marianne T. Sperrevik.